Main aur Meri Asliyat

 Main aur meri asliyat, hamesha se hi ek duje se juda the..

Lekin ye asliyat bhi do tarah ki thi..

Ek wo jo mere chanchal mann ke aadhin tha..

Ek wo jisse kabhi bachpan me mila tha..

 

Mere chanchal mann ne hamesha hi mujhe pichhe dhakela hai..

Mujhko mujhse bohot zyada duur kiya hai…

Kabhi bhi mujhe meri khud ki pehchaan samjhne na diya…

Isne to mujhe mere apnon se bhi duur kiya hai..

 

Aaj ye naubat aa gyi hai ki main khud ke hone pe sawaal karta hu..

Pachtawa itna hai ki sochte sochte thak jaata hu…

Karna to bohot kuch chahta tha, lekin logo ki baton me main aaj ulajhke reh gya hu..

Fir bhi koshish kar rha hu ki khud ke andar jhaanku aur jagaao usey..

Jisey ye pata hai ki main akele hi kitna kuch kar sakta hu.

Khud ko…

 Khud ko bechaara main kehta raha…

Asliyat hamesha duur bhaagta raha…

Zamaane ne aadat dilayi tulna ki…

Zamaane ko hi hamesha kosta raha.

 

Bachpan ki aadat jawani tak aa gyi..

Apne aap ko main aur chhota aur kamzor banata rha..

Main samjha tha sabko waqt dena insaniyat hai shayad..

Dhokha tha, haqeeqat samajhke jeeta rha.

 

Kal ki fikar karne ki aadat ek bimari si ban gyi hai..

Apne ghamon ke farzi bojhey ko uthaate uthaate thak chuki hai..

Pata nhi kyu khush rehna mushkil sa ho gya hai..

Hasi ke mukhotey ko pehne rehna aadat si ho gyi hai..

 

Main jaanta hu ki mere chahne na chahne se duniya nhi chalegi…

Main jaanta hu ki mere jaane se ye duniya rukegi nhi…

Main jaanta hu ki mere chahnewale meri is baat ko manenge nhi..

Main jaanta hu ki meri zindagi keemti hai hi nhi…

 

Kaha jaaun, kya karu, kis kis ko apna bekar sa dukhra sunau,

Kaun sunega apni zindagi ke mashakkaton ko nazarandaaz karke,

Kaun sunega aisi sharmnaak kisson ko,

Kaun sunna chaahega meri bekar si zindagi ke dukhdon ko,

Kyu sunega koi? Kya kiya hai maine unke liye? Kyu chahta hu main unka tawajjo?

 

Aisa to nhi hai ki mere maa baap ne mujhe kuch karne se roka,

Apni manmani karne se toka,

Apne tareeke se zindagi jeene ki aadat ko galat kha,

Apne aish-o-aaram ko chhorkar unke dekhbhaal ke liye kaha..

 

Par ab jab apni galtiyon ka ahsaas hota hai,

To yehi ahsaas hota hai,

Ki maine na to ek accha beta, bhai, dost, student, colleague ya padosi ka kirdar nibhaaya hai,

Shayad meri aankhon ke saamne pardah hai,

Shayad ye meri galatfehmi hai…

Shayad ye main nhi hu, fir bhi haqeeqat to yehi hai.